cap.ru сайтри сӑн

Ҫӗнӗ Шупашкарта ҫӗнетнӗ суту-илӳ вырӑнӗсем уҫӑлнӑ. ЧР ял хуҫалӑх министрӗ Сергей Артамонов каланӑ тӑрӑх, пӗлтӗр кунашкал лапама Шупашкарта хута янӑ.

Суту-илӳ вырӑнӗсене Винокуров урамӗнчи 23-мӗш ҫурт ҫывӑхӗнче асӑрхама пулать. Ҫак лапама республика хыснинчи укҫа-тенкӗпе тунӑ. Кун хыҫҫӑн ӑна тӳрех Ҫӗнӗ Шупашкар хула администрацийӗн балансӗ ҫине куҫарнӑ.

Сутуҫӑсене вырӑнпа тӳлевсӗрех тивӗҫтереҫҫӗ. Унта халӗ йӑлтах хӑтлӑ. Пӗчӗк пасара электричество та ҫитернӗ. Ҫапла сутуҫӑсем хӑйсемпе пӗрле сивӗтмӗш те илсе килме пултараҫҫӗ.

https://vk.com/wall-88512381_137995 сӑнӳкерчӗкӗ

Республикӑн агропромышленность комплексӗнче ӗҫлекенсене тава тивӗҫлӗ ятсем панӑ.

«Чӑваш Республикин тава тивӗҫлӗ механизаторӗ» ята Муркаш районӗнчи «Ударник» кооперативра тракторист-машинистра тӑрӑшакан Николай Иванова панӑ.

Муркаш районӗнчи «Моргаушская» кайӑк-кӗшӗк фабрикинче электромонтёрта тимлекен Алексей Карандаев, «Ядринмолоко» уҫӑ акционер обществин водителӗ Сергей Корольков, унти слесарь-электрик Михаил Якимов, Комсомольски районӗнчи «Слава картофелю» (чӑв. Ҫӗрулмие мухтав) агрофирмӑн водителӗ Альберт Можаев, Чӑваш патшалӑх аграри университечӗн «Студенческий» вӗренӳпе практика центрӗн пуҫлӑхӗн заместителӗ Леонид Чистяков «Чӑваш Республикин ял хуҫалӑхӗн тава тивӗҫлӗ ӗҫченӗ» ята тивӗҫнӗ.

cap.ru сайтри сӑн

Ӗнер Красноармейски районӗнчи Яманак ялӗнче доярсен республика конкурсӗ иртнӗ. Унта хутшӑнакансем теори пӗлӗвне тӗрӗсленӗ, ӗне сумалли аппарата сӳтсе пуҫтарнӑ.

Чемпион ятне Комсомольски районӗнчи «Рассвет» ЯХПКри Петр Зверев ҫӗнсе илнӗ. Вӑл 96,31 балл пухнӑ. Вӑл Чулхулара ҫурла уйӑхӗн 16-19-мӗшӗсенче иртекен Пӗтӗм Раҫҫейри тупӑшура республика чысне хӳтӗлӗ. Петр кӗпе-йӗм ҫумалли машинӑна тивӗҫнӗ. Иккӗмӗш вырӑншӑн телевизор панӑ, виҫҫӗмӗшӗшӗн – микрохумлӑ кӑмака.

stop-klopu.com сайтри сӑн

Россельхознадзор ӗҫченӗсем уй-хире тӗрӗслесех тӑраҫҫӗ. Культурӑсене сӑтӑрҫӑсем сиен тумаҫҫӗ-и?

Ведомство палӑртнӑ тӑрӑх, хӑш-пӗр ҫӗрте уй-хире сӑтӑрҫӑсем тапӑннӑ. Уйрӑмах – кӑнтӑр районӗсенче. Кӑҫал вӗсем уйрӑмах нумайланнине палӑртнӑ Мӗнпе ҫыхӑннӑ-ха ҫакӑ? Чи малтанах ҫуркунне ир килнипе. Ял хуҫалӑх ертӳҫисен айӑпӗ те пур. Чылайӑшӗ уй-хире сухаламасть. Сӑтӑрҫӑсенчен нумайӑшӗ вара тӑпрара ҫиелте пурӑнать, ҫаплах хӗл каҫать. Ҫӗре сухаламасан вара вӗсем пӗтмеҫҫӗ. Ҫитменнине, кӑҫал ҫӗр ытлах шӑнман.

«Пӗр тӑхтамасӑр им-ҫам сапмалла. Унсӑрӑн тухӑҫ туса илеймӗпӗр. Гербицидсемпе пӗрле чир-чӗре пӗтерме биологи тата хими препарачӗсемпе усӑ куратпӑр», - ҫапла пӗлтернӗ Россельхознадзор.

t.me/nikamran канала вырнаҫтарнӑ сӑнӳкерчӗк

Чӑваш Енре дояркӑсен тата выльӑх-чӗрлӗхе искусствӑлла майпа пӗтӗлентерекенсен конкурсне ирттересси чылай ҫул каяллах йӑлана кӗнӗ. Ял хуҫалӑхӗнче тӑрӑшакансене ҫапла майпа хавхалантарни, пӗр-пӗрин опычӗпе паллаштарни, малалла талпӑнма илӗртни питех те аван.

Ӗнене машинӑпа сӑвакан операторсем (ӗнене алӑпа сума тахҫанах пӑрахнӑ ӗнтӗ) тупӑшӑва кӑҫал та пухӑнӗҫ.

Конкурс ҫӗртме уйӑхӗн 15-мӗшӗнче Трак тӑрӑхӗнче, унти «Красное Сормово» хуҫалӑхра, иртӗ. Унта тӗрлӗ тӑрӑхри 21 оператор хутшӑнӗ.

cultobzor.ru сӑнӳкерчӗкӗ

Чӑваш Ен Элтеперӗ Олег Николаев ял хуҫалӑх отраслӗнче тӑрӑшакансене сума сунӑ. Ҫӗртме уйӑхӗн 6-мӗшӗнче алӑ пуснӑ 70-мӗш номерлӗ хушура вӑл республикӑри тӗрлӗ отрасльте тӑрӑшакансене патшалӑх наградисемпе чыслама йышӑннӑ.

«Чӑваш Республикин ял хуҫалӑхӗн тава тивӗҫлӗ ӗҫченӗ» ята Муркаш тӑрӑхӗнчи Е. Андреев ячӗллӗ ӑратлӑ заводра ӗҫлекен Владимир Морозова тата Патӑрьел тӑрӑхӗнчи «Исток» агрофирмӑри Мария Яковлевӑна пама йышӑннӑ.

Владимир Ильич машинӑпа трактор мастерскойӗн заведующийӗнче тӑрӑшать, Мария Николаевна пӑру пӑхать.

vk.com сайтри сӑн

Республикӑра Питравра, утӑ уйӑхӗн 12-мӗшӗнче, ҫырла фестивалӗ иртӗ. Ун валли логотип суйлаҫҫӗ.

Ӑна халӑха суйлама сӗнеҫҫӗ. Пӗтӗмпе 4 вариант сӗннӗ. Вӗсемшӗн ЧР Ял хуҫалӑх министерствин «Контактри» ушкӑнӗнче ҫӗртме уйӑхӗн 11-мӗшӗччен сасӑлама май пур.

Аса илтерер: фестиваль Шупашкар районӗнчи Хыркассинче «Ивушка» питомникре иртӗ.

fotostrana.ru сайтри сӑн

Чӑваш Енри чипс туса кӑларакан савут кӑҫал кӗркунне ӗҫлесе каймалла. Ӑна юпа уйӑхӗ валли, Ял хуҫалӑх ӗҫченӗсен кунӗ тӗлне, уҫма пултарассине пӗлтернӗ ЧР Элтеперӗ Олег Николаев. Сӑмах май, ку уява юпан иккӗмӗш вырсарникунӗнче паллӑ тӑваҫҫӗ. Кӑҫал 8-мӗшне лекӗ.

Савут Патӑрьел районӗнчи Анат Туҫа ялӗнче вырнаҫӗ. Патшалӑх "Лук-Агро" хуҫалӑха хатӗр-хӗтӗр туянма 30 процент субсиди парать.

cap.ru сӑнӳкерчӗкӗ

Муркаш районӗнче ҫынсем ҫырла ӳстерсе тата ӑна татса укҫа тӑваҫҫӗ. Кун пирки Мӑн Сӗнтӗрти вулавӑшра ирттернӗ Аграри пӗлӗвӗсен кунӗнче калаҫнӑ.

Муркаш муниципалитет округӗн Депутатсен пухӑвӗн депутачӗ, Александр Иванов усламҫӑ ҫырлана 13 гектар ҫинче ӳстерет. Хӑй та пайта курать, ӗҫлеме ӳркенменнисем те аван тупӑш туса илеҫҫӗ. «Ун патӗнче эпӗ пӗлтӗр кунсерен 3-шер пин тенкӗлӗх ҫырла татнӑ», — пӗлтернӗ канашлӑва хутшӑннӑ пӗр хӗрарӑм.

Ҫырла татма ирхи 5 сехетре тухаҫҫӗ, 11 сехетчен ӗҫлеҫҫӗ.

Муркаш тӑрӑхӗнче улма-ҫырла культурисен лаптӑкӗ 202 гектарпа танлашать. Ку вӑл асӑннӑ культурӑн республикӑри лаптӑкӗнчен 44 процент пулать.

cap.ru сӑнӳкерчӗкӗ

Чӑваш Енре туса илекен йӗтӗн ют ҫӗршыва ӑсанать. Республикӑн Ял хуҫалӑх министерствинче пӗлтернӗ тӑрӑх, «Средняя Волга» агрофирма чикӗ леш енне 40 тонна ытла йӗтӗн ӑсатнӑ.

Республикӑран агропромышленность продукцине ют ҫӗршыва ӑсатасси тӗрлӗ чару саманинче те чакман. 2023 ҫулхи пӗрремӗш кварталта агропромышленность продукцине пирӗн тӑрӑхран 8,7 пин тонна ӑсатнӑ, ку вӑл унчченхи ҫулхи кӑрлач-пуш уйӑхӗсенчинчен 54 процент нумайрах. Ҫакӑн пек пӗлтернӗ республикӑн ял хуҫалӑх министрӗ Сергей Артамонов.